Հայ
Բու Այլ Տուն
Բու Այլ Տունը գտնվում է Վանաձորի կիրճում՝ անտառի, մարգագետինների ու լեռնային գետակի հարևանությամբ մի չքնաղ վայրում: Նախկինում այս շրջանում վանաձորցիների ամառանոցներն են եղել, որոնցից շատերը 1990-ականների ճգնաժամի հետևանքով լքվել են, և կիրճի այս հատվածը համեմատաբար վայրի է դարձել: 2016-ին ԷկոՀաբ հիմնադրամը գնեց կիրճում գտնվող լքված շինությունը, իսկ այնուհետև, մի քանի տարվա ընթացքում, տասնյակ կամավորների ու աջակիցների ջանքերով այն վերածեց մի յուրահատուկ կենտրոնի, որը կրթության, թիմային աշխատանքի, տարբեր միջոցառումների և հանգստի հրաշալի վայր է դարձել:
«Բու այլ տան» գաղափարը
2011 թվականից ի վեր ԷկոՀաբի թիմը ոչ ֆորմալ կրթության դասընթացներ է կազմակերպում Հայաստանի տարբեր շրջաններում բնակվող երիտասարդների համար կենսակայուն զարգացման և ակտիվ քաղաքացիության մասին: Մենք ուզում էինք հիմնել մի տարածք, որը հարմար ու տրամադրող միջավայր կստեղծեր այս կրթական աշխատանքները շարունակելու համար: ԷկոՀաբի թիմի մի զգալի հատվածը բնակվում էր Վանաձորում, ուստի, բնականորեն, ընտրությունը կանգ առավ հենց այս տեղի վրա: Վանաձորի կիրճը մեզ գրավեց իր գեղեցիկ բնությամբ, խաղաղությամբ և առանձնացված տեղադիրքով: Այս վայրը նաև հնարավորություն էր տալիս իրագործելու կենսակայունության մասին մեր պատկերացումները՝ գտնել այլընտրանքային էներգիայի աղբյուրներ, վերամշակել ու վերօգտագործել, համեղ բուսական սնունդ մատուցել, մոտ լինել բնությանը… ԷկոՀաբի համար «Բու այլ տունը» նաև տնտեսական անկախության աղբյուր էր: Այն թույլ կտար տնտեսել հյուրանոցների վրա ծախսվող գումարները և հավելյալ եկամուտ ունենալ տունը վարձակալությամբ տրամադրելուց: Եկամուտի մի մասը մենք կկարողանայինք տրամադրել Հայաստանի տարբեր քաղաքներում և գյուղերում ԷկոՀաբի շրջանավարտների նախաձեռնությունները ֆինանսավորելուն:
Սոցիալական և բնապահպանական ներդրումներ
Բու Այլ Տան վերանորոգումը հնարավոր դարձավ սոցիալական և բնապահպանական ներդրումների գաղափարի շնորհիվ: Ի՞նչ է սա իրենից ներկայացնում: Մենք դիմեցինք Հայաստանում և արտերկրում ապրող մեր ընկերներին ու բարեկամներին և խնդրեցինք 3 տարի ժամկետով պարտքով գումար տրամադրել (500 եվրո կամ ավելին): Այս գումարը պարտավորվեցինք վերադարձնել երեք մասով՝ ամեն տարվա ավարտին, և հետն էլ ուղարկել ԷկոՀաբի շրջանավարտների պատրաստած տարբեր արտադրանքներից հավաքված փոքրիկ նվերների փաթեթներ: Այս դիմումին արձագանքեց շուրջ 30 հոգի, որոնք տարբեր չափի գումար տրամադրեցին. իսկ մի քանիսը որոշեցին նվիրատվություն անել՝ գումարը տրամադրել առանց վերադարձի ակնկալիքի: Մենք նամակներ գրեցինք նաև Հայաստանում գործող տարբեր շինանյութի խանութների, կազմակերպությունների ու հյուրանոցների՝ ներկայացնելով նրանց Բու Այլ Տան գաղափարը և առաջարկելով մեզ նվիրաբերել, օրինակ, թեթևակի վնասված սալիկներ, կահույքի կամ սպասքի պարագաներ, որոնք մեզ պետք կգային շինարարության ու ձևավորման համար: Արդյունքում՝ հավաքագրվեց մեզ անհրաժեշտ շինանյութի գրեթե ամբողջ ծավալը:
